Errezeta

Ongi garbituko dizkigute txitxarroak arrandegian, tripak, burua, alboko hezurrak eta isatsa kendurik. Txikiak badira, bitan zatituko ditugu; ertainak badira, lautan. Oliba olioa isuriko dugu zartaginean, bi hatzeko neurria harturik. Su eztian gozatuko ditugu baratxuriak, erre gabe olioa ongi kutsa dezaten. Minutu gutxi batzuen ostean, baratxuriak atera, sua biziagotu eta txitxarroak sartuko ditugu, gatza eman eta irinetan azaletik igurtzi eta gero. Buelta eta buelta frijituko ditugu ondoren, minutu batez alde bakoitzetik. Bizpahiru txandatan egingo ditugu txitxarroak, olioaren tenperatura apal ez dadin. Xukatu eta berehala zerbitzatu egingo ditugu txitxarroak, gorri eta kraskatsu.

Txitxarro frijituta