Errezeta

Kazola zabal batean oliba olioa isuri eta su ez oso bizian jarriko dugu. Bero dagoenean, itsaskien azalak eta txangurru eta nekora puskak gehituko ditugu, kolorea hartu arte utzi, baina ez daitezela erre. Irin pixka bat bota par-par eginez. Gorritu egingo da gantza, seinale ona. Egosten 15 minutu pasatu eta gero, atera eta katilu batean gordeko ditugu, geroko. Olio gehixeago jarri eta tipulinak, porruak, baratxuri aleak, tomateak eta gatz pixka bat botako ditugu. Egin dagila dena batean, su eztian, beste 15 minutuan.

Orduan lehenago baztertu dugun itsaskia gehituko dugu, katiluan genuena bere zukuarekin. Nahasi eta gero ardo beltza eta brandya o armagnac isuriko dugu bertan, soberako zuku ia guztia lurruntzen den arte. Tomate saltsa gehitu, eragin, eta ur beroa jarri, oparo. Gatza eman gero. Zaporea indartze aldera, itsaski-salda kontzentratuko pastilla bat gehi dezakegu, baita kaiena pixar bat ere, zapore azkarrak gustatzen bazaizkigu. Dena irakiten jarri 30 minutuz. Gero dena birrindu eta iragazkitik pasatu. Minutu batzuez saltsa amerikarra sutan jarri irakin dezan. Horrela kolorea eta zaporea pausatuko dira. Gatza eman gero, beharrezkoa bada.

Saltsa hau ezin hobea da itsaski haragitsuekin, xapo frijituarekin eta beste arrain batzuekin jateko. Baita bakailaoarekin ere, zartaginean pixka bat gorritzen baduzu, saltsa egiten bukatu baino lehen.