Errezeta

Koipearen aldetik hartuko ditugu paparrak eta sare bana ziztatuko diegu labana zorrotz batez, haragia ukitu gabe. Errazago desegingo da horrela koipea paderan. Su ezti-eztian paratuko dugu padera bat berotzen, eta hartan jarriko ditugu baratxuri aleak eta paparrak, koipearen aldetik. Poliki-poliki urtuko da koipe hori, eta metatzen den heinean aterako dugu guk paderatik, paparrak lehor eta koiperik gabe eduki behar baititugu lanean segitu ahal izateko. 20 bat minutu emango ditugu koipea horrela urtzen, magreta irauli gabe; su ezti-eztian egingo dugu lan hasieran eta biziagotuz joango bagara ere, sekula ez dugu kerik eragin dezan utziko.

Paparrean geratzen den koipe geruza huskeria dela, koipea urtu eta paparra egoki txigortu dela, ikusi orduko, irauliko egingo dugu paparra eta beste 30 bat segundoan utziko dugu alde horretatik egiten, gordin itxura gal dezan. Magreta txikiagotu egingo zaigu, tamaina galduko du. Ohol edo plater baten gainean utziko ditugu ondoren lau paparrak, eta plater batez estalirik edukiko ditugu 3 bat minutuan, barruko zukua modu berdinean bana dadin pieza guztian. Mozterakoan zuku gutxi aterako da jario horretan, haragi puskak ongi erre, egoki pausatu eta gatzik gabe maneatu direlako. Platerean dauzkagunean emango diegu gatza!

Abrikot salteatu batzuekin aurkeztuko dugu magreta. Hona hemen nola prestatu. Garbitu eta bitan zatituko ditugu abrikotak. Hezur horietako bat puskatu eta barruko hazia hartuko dugu. Padera bat su gainean daukagula, karamelatzen jarriko dugu azukrea; mutur gurina erantsiko dugu karamelua iluntzen ari dela sumatzean. Berehala irauliko ditugu ondoren abrikotak eta hezur barruko hazia, kanela adaxkarekin batean, su bizian gaiei bizkor eraginez, kolore gorria hartuagatik fruta oraindik leun eta desegin gabe dagoela. Pare bat minutu izango dira su gainean. Erretiratu eta ahate papar errearen ondoan zerbitzatuko dugu fruta.

Ahate magret errea abrikotekin