Arrautza poxatuak egiteko era tradizionala sinplea da oso: xorrotada bat ozpin (edo limoi zuku) duen ur irakinetara apurtu arrautza eta goilara batekin forma borobilari eusten saiatu, alferrik izango den arren: arrautza ez zaizu guztiz borobila aterako. Lauzpabost minutu beharko ditu behar duen tornuia ukaiteko. Gero atera sukalde-paper baten gainera, eta saiatu ertzak laban txorrotx batez txukuntzen… Edo ikusi nola egiten dugun geuk hemen jarri dizugun errezetan.

Osagaiak:

• Arrautzak
• Ura
• Gatza
• Sukaldeko film gardena
• Haria

Errezeta:

1. Kikara edo ontzi txiki baten hondoan jarri sukaldean erabiltzeko moduko film gardenezko zati bat, arrautza bilduko duen zorrotxo bat sortzeko bezainbestekoa.
2. Olio tanto batez igurtzi eta jarri aurrautza bertan. Borobil geratuko zaizu, kikararen hondoari esker.
3. Gatz apur bat gehitzea aski da, baina, nahi baldin baduzu, atsegin duzun beste edozein gai ere jar diezaiokezu, segun eta arrautza zerekin jan behar duzun.
4. Bildu filmaren ertzak eta lotu hari edo lokarri batekin, ahalik eta aire gehien kenduz paketetxoari.
5. Ura irakiten hasten denean, sartu bertara arrautzak eta utzi lau minutuz egosten.
6. Denbora hori egindakoan, atera zorrotxoak ur berotatik eta ur hotzetan sartu. Behar baduzu, izotza ere gehitu, egosketa kolpetik eteteko.

Haria moztu eta hortxe dituzu arrautza poxatu borobil borobilak.

Kasu!

Arrautza poxatuak mila gauzarekin erabil ditzakezu: ilarrekin, urdaiazpiko apur batekin, zainzuri epel batzuen gainean, patata egosi batzuekin…

Bestalde, badakigu argazkikoak ez direla arrautza poxatu ortodoxoegiak, baina guri arrautza apenas eginda gustatzen zaigu, zuringoa dariola. C’est comme ça, zer egingo diogu ba!

Arrautza poxatuak