Errezeta

Hondoa egiteko: Irina gopor batean ipini eta hartan gaineratuko ditugu gurin guria, dadotan, arrautza gorringo bakarra, azukrea eta gatza. Hatz puntak sartu eta, arian-arian, oratuko dugu guztia, nahastura hondartzako hondar hezearen itxura hartu arte. Ura erantsiko dugu orduan: ura nahasturarekin bat egin ahala ikusiko dugu nola hasten den orea goporraren paretetatik askatzen. Komeni da orea gehiegi ez lantzea, elastiko geldi ez dadin. Paperean bildu edo bol batean sartuko dugu, ongi tapatuta, eta gutxienez ordu betean edukiko hozkailuan.

Epe horren ostean, arrabol batez mehe-mehe zabaldu eta aurrez gurinez eta irinez estalitako molde batean egokituko dugu. Ongi estutuko dugu orea, egoki sar dadin. Hozkailuan pausatzen utziko dugu berriro orea, moldean zabal-zabal, 30 minutuan.

Orea egiteko: Eltze giderdun bat sutan jarri eta hartan erantsiko ditugu ura eta hirugihar xerrak. Irakiten hasi orduko atera, xukatu eta berreskuratuko ditugu hirugihar xerrak. Jakiak itsasten ez diren padera batean salteatuko ditugu ondoren gurin pixka batez. Ez diogu gurinari kolorerik hartzen utziko, urtu egin dadila besterik gabe. Moldea hozkailutik atera eta hirugihar xerrak paratuko ditugu haren hondoan. Gopor batean joko ditugu gero gelditzen zaizkigun gorringoak eta arrautza osoak. Esnea eta esnegaina erantsiko ditugu ondoren, gatz pixka batez. Nahastura hau iragazki batez pasatuko dugu moldera, hirugihar xerren gainera, eta aurrez 220º-tan beroturiko labean edukiko dugu ondoren tarta, 5 bat minutuan. Haien ostean, tenperatura 180º-jarri eta beste 25 bat minutuan edukiko dugu.

Paderan, oliotan edo gurinetan, gatz pixka batekin gorrituriko tipulatx edo tipulin zerrenda batzuk ere ipintzen dituzte batzuek, hirugiharrarekin batean. Bestalde, oparo estali ahal izango dugu Gruyère gaztaz tartaren gainazal osoa, labean sartu aurretik. Eskarola entsalada on baten eskutik, jaki izugarri mamitsua da quiche hau.