Errezeta

8 edo 10 puskatan zatituko dugu oiloa, ahalik eta koipe gehiena erretiratuz. Gatza pixka bat emango dugu ondoren. Kazola zabal batean gorrituko ditugu puskak, alde guztietatik. Azenarioa, porrua, baratxuriak eta tipula erantsi, gai horiek guztiak biraka erabili eta ardo beltzaz uraz eta salda pastillaz bustiko ditugu ondoren. Kazola estali eta 90 bat minutuan edukiko dugu egosten guztia. Hozten utziko dugu ondoren.

Horrela maneaturiko haragia eskutan erabil dezakegun unean, hezurgabetu egingo ditugu puskak, betegarria egin ahal izateko. Iragazi eta koipea kenduko diogu saldari; sutan jarriko dugu ondoren, salda lodi bat lortu arte.

Beste kazola batean, olio pixar bat jarri eta tipulin pikatuak maneatuko ditugu, gatz pixka batez. Su eztian utziko ditugu izerditzen, xamur eta gorri gelditu arte. 45 bat minutu iragoko dira. Barrengorriak erantsi eta tipulinarekin batera salteatuko ditugu, 20 bat minutuan, gorritu arte. Gatz pixka bat eman eta oilokia sartuko dugu ondoren, papurtua. Arestian urritu eta loditu dugun saldaren erdia erantsiko dugu ondoren, eta egosten edukiko dugu guztia, zukua murriztu eta betegarria ongi goxa dadin. Gatz-puntua neurtu, zuzendu eta ongi nahasiko dugu ondoren guztia. Trinko geratu behar du.

Kaneloien zuloak beteko ditugu hurren. Bi aukera ditugu orain. Lehenengoaren arabera, erretilua batean jarriko ditugu kaneloiak eta, oiloaren zuku murriztua, mutur batzuk gurin eta xorta bat ardo zuri erantsi ondoan, labean eztiki berotu. Etengabe bustiko ditugu, orea egoki hidrata dadin eta kaneloiak mamitsu erre daitezen. Bigarrenaren arabera, tomate eta bexamelez prestaturiko hondo batean murgilduko ditugu kaneloiak; ondoren, bexamel gehiago eta gazta birrindua erantsiko dizkiegu gainetik eta gutxienez 20 minutuan edukiko ditugu labean, azala gorritu eta mamia zaporetsu geratu arte.