Errezeta

Ur asko jarri eltze batean, gatzarekin, eta bertara abakandoak sartuko ditugu egosteko. Lehenbiziko borborrak hasten direnean, minutu bat kontatu, abakandoak eta ongi xukatu. Horrela abakandoak hil egiten dira, ez dute sufrituko puskatzean eta, bestetik, pixka bat egostean, koralak eta barreneko zukua mamitzea lortzen dugu, eta, ondorioz, ez da galduko sukaldeko oholaren gainean puskatzean. Ohartuak zarete segur aski, noizbait abakando bizia mahai batean puskatu baldin baduzue, zuku asko galtzen duela. Moztu aurretik minutu batez egosten badira, problemarik ez.

Buztanetik burua eta pintzak bereiziko ditugu. Pintzei kolpe bat eman eta biak batera aterako ditugu, aurreko bi junturak askatzeko. Burua bi puskatan moztuko dugu, eta gero puska txikitan. Buztanak, mahaiaren kontra ongi estutu, junturen aldetik moztuko ditugu, medailoietan, labana ongi zorroztu baten laguntzarekin. Puska guztiak gazitu.

Zartagin zabal batean olioa berotu eta bertara abakando puskak botako ditugu, ongi salteatu daitezen. Ongi gorritu daitezela, eta zuku pixka bat utz dezatela zartaginean karamelu itxura har dezan. Gero baratxuria eta tipulina gehitu, ongi nahasi eta brandya eta tomate saltsa erantsi. Orduan pasta egosi berria eta xukatua gehitu, eta salteatu dadila pixka batean abakando puskekin batera. Gero perrexila par-par bota gainetik eta zerbitzatu.

Pasta abakando eta miserarekin