Errezeta

Uretan egosiko ditugu patatak, gatz pixka batekin. Xukatu eta egosi diren kazola berean utziko ditugu pausatzen, urik gabe eta tapaturik. Erre gabe erabili ahal izango ditugun unean zurituko ditugu. Puregailu batetik pasatuko dugu ondoren mamia.

Kazola batean olio pixar isuri eta hartan eztituko ditugu tipulina, piperra, alberjinia, dadotan moztua eta gatz pixka bat, guztia xamur eta azaletik gorrixka gelditu arte. 40 bat minutu su ertainean. Ondoren erantsiko dugu haragia. Gozatzen utziko dugu zurezko zaliari eragiteari utzi gabe. Gatza eman eta ximiko bat tomate saltsa gaineratuko dugu gero. Su eztian maneatuko dugu guztia, halako bolognesa moduko haragi-nahastura idorra lortu arte.

Patata portzio bat hartu eta zulo txiki bat itxuratuko dugu harekin: haragi-betegarriaz hornituriko koilarakada eder bat sartuko dugu haren barruan. Koilara atera eta patata mamiaz estaliko dugu zuloa, patatak berregiten ariko bagina bezala. Ongi itxiko dugu patata, betegarria gal ez dadin. Honela jokatuko dugu, patata-mamia eta betegarria ahitu arte.

Irin, arrautza eta ogi birrinduan pasa eta olio ugaritan frijituko ditugu patata-bolak. Saltsan ere presta ditzakegu edo arian-arian egosi, patata arranditsuen antzera, edo frijitu berri tomate saltsa baten ondoan aurkeztu.

Haragiari gibel kopuru txiki bat ed txerri hanka egosi pikatuak erants diezazkiokegu. Zaporetsuago egongo dira patatak.