Errezeta

Muturrak kazola handi batean prestatu, muturrak saltsan prestatzeko errezetan esaten den bezala, barazkiekin, eta samur-samur gelditu arte. Ateratzen den salda zopatarako gorde dezakegu, koipea ongi kenduta, edo potxak egosten hasteko, ur pixka bat gehituta.

Potxak ongi garbitu eta eltzean jarri, eta gainetik bota ur hotza eta muturrak egostean gelditu den salda (baina hotza, oso inportantea), bi hazbete potxen gainetik. Olio gordina gehitu, gatz pixka bat, tipulin erdibitua, piper berdea ongi garbituta eta haziak kenduta, eta tomatea ere osorik. Eltzea estali eta su ezti-eztian jarri. Lehenbiziko irakin-zantzuak hasi arte 25 minutu pasa behar dute gutxienez, eta irakiten hasten denean ezari-ezarian egon behar dute beste 25-35en bat minutuz. Bitsa eta zikinkeria ur gainera aterako dira, eta kontu handiz kendu behar dira bitsadera batekin. Oso inportantea da su txikian irakitea, aleak ezari-ezarian egin daitezen, lehertu eta azala urratu gabe.

Denbora hori pasatutakoan, barazkia atera, tipulina, piperra eta tomatea, eta sartu irabiagailuaren ontzian, egostean egindako salda pixka batekin batera, eta jarri potentziarik handienean. Iragazki batetik pasatuz, gehitu hori dena potxa egosiei. Beste 15en bat minutuz eduki egosten su eztian, salda loditzen.

Muturrak zatitu (ez oso puska handitan) eta kartilagoak eta alde gogorrak kendu. Potxak zopa-ontzi handi batean jarri eta lagungarri gisa muturrak jarri, oliba olio birjina estraz gobernaturik. Muturrak potxetan sartu eta batera zerbitzatzea ere badago, pausaldian atera zaien zukua gehituta. Gustu kontua da.